Fréttamenn kíki niðreftir takk.

Mér þætti gaman ef þessi fréttamaður hefði gert sér leið niður á Atvinnumiðlun höfuðborgarsvæðisins og annarra stórra sveitarfélaga, og hefði fengið upplýsingar um laus störf sem enginn er að vinna.

Það er nefnilega stór munur á venjulegu Atvinnuleysi, og Atvinnuleysi sökum skorts á atvinnu.

Þegar ég missti vinnuna 1.ágúst, fór ég niður á Atvinnumiðlun og skráði mig atvinnulausan til þess að fá mínar bætur. Ég var að leita að nýrri vinnu sem hæfði mínu námi, og vildi fá allavega einhverja peninga í millitíðinni ef illa gengi að fá vinnuna. Í það heila kom ég held ég 4 sinnum niður á Atvinnumiðlun á um 2 mánaða tímabili, og alltaf voru tugir eða hundruðir lausra starfa í boði sem ég sá uppi á korktöflu, og svo haugur til í tölvukerfinu. Ég gekk hinsvegar framhjá þessum lausu störfum því ég var ekki að leita mér að þessum störfum.. og mér leið satt að segja mjög illa.

Ég skammaðist mín fyrir að vera svo kræfur að heimta bætur þegar það vantaði fólk í vinnu útum allt!

Hins vegar réttlætti ég það fyrir mér sem svo að ég VAR að koma úr skóla og búinn að eyða fullt af peningum í það, og fannst lágmarkið að gera allt sem ég gæti til þess að finna mér vinnu við þann starfsvettvang. Ef ég hefði ekkert fengið fljótlega (innan kannski 2-3 mánaða) þá hefði ég farið og fengið mér öðruvísi vinnu.

Þarna kaus ég semsagt að vera á atvinnuleysisskrá frekar en að taka þeim störfum sem eru í boði. Spurningin er því, hversu margir af þessum 3.700, gætu verið að vinna akkúrat núna?

Rúmlega 3.700 á atvinnuleysisskrá

FRÁBÆRT framtak...

Já, þetta er heldur betur frábært framtak hjá honum nafna mínum. Hann er kannski ekki svo vitlaus í peningamálum eins og maður hefði haldið miðað við val á námi.

En nú vantar bara að klára pakkann. Afnema þessi bévítans stimpilgjöld algjörlega!

Þegar ég keypti mína fyrstu íbúð, sem var á Akureyri og kostaði tæpar 6 milljónir, borgaði ég sem samsvaraði tveimur heilum mánaðarlaunum í stimpilgjöld. Það hlýtur hver maður að sjá að ég gæti vel notað tvenn mánaðarlaun í eitthvað allt annað... eins og til dæmis að kaupa húsgögn í íbúðina (sem ég tók reyndar lán fyrir) eða borga bara meira inn á íbúðina og skulda aðeins minna.

Stimpilgjöld eru rán! Afnemum þau strax! 

Lánin ekki stimpilgjaldsskyld

Hann segir ekki neitt!

Hvernig er þetta með þessa menn.. fara þeir á námskeið til að læra að halda langar ræður og segja samt akkúrat ekki neitt??

Hvað ætlið þið að GERA fyrir þjóðina sem kaus ykkur, þið vanþakklátu og spilltu einræðisherrar?! Lokið gininu og hreyfið á ykkur rassinn.. það er kominn andskotans tími til! 

Ríkisstjórnarfundi lokið

Útflutningur á þekkingu

Það gleður mig alltaf þegar Íslendingar standa í ALVÖRU útflutningi sem bragð er að. Hér er verið að selja út mikla þekkingu og reynslu Íslendinga á sviði jarðvarmaorku, sem við erum jú algjörir sérfræðingar í, enda 98% af Íslenskum heimilum kynnt með heitu vatni úr borholum landsins.

Það má vel vera að Jarðborganir teljist að einhverju leiti keppinautar míns vinnuveitanda, en maður verður að óska þeim til hamingju engu að síður :) 

Stærsti samningur Jarðborana erlendis

Til hamingju!

Vildi bara óska öllum íbúum Keflavíkur og nágrannabæja, og bara öllum sem þurfa að keyra þessa götu reglulega, innilega til hamingju með það að það sé LOKSINS búið að klára að laga þennan blessaða veg. Ég vona að þetta komi til með að standa undir kostnaði með umtalsvert færri slysum og dauðsföllum!

Nýr kafli á Reykjanesbraut tekinn í notkun

Skólar og trúmál - Hugleiðing

Þennan texta skrifaði ég sem svar við grein á spjallborðum http://www.nyjaisland.is og býð ég fólki að skella sér þangað ef það vill taka þátt í málefnalegum umræðum um framtíð þjóðar vorrar:

Ég hef mikið verið að hugsa um aðskilnað ríkis og kirkju síðustu árin, og þá einna helst aðskilnað skóla og kirkju.

Ég hef aldrei verið neitt sérstaklega trúaður maður. Það að fara í kirkju hefur (því miður?) verið eitthvað sem maður gerir bara í giftingum og jarðarförum. Þó er nú svo að ég hef í seinni tíð myndað mér mína eigin skoðun á þessum málum og komist að því að ég trúi því að til sé eitthvað æðra máttarvald. Hvort sem það máttarvald býr eingöngu í hjörtum okkar eða uppi á einhverjum yndislegum stað sem kalla mætti "himnaríki", skal ég láta ósagt. Ég er hins vegar það sem kallast Agnostic í minni trú (ég kann bara ekki Íslenska heitið, og væri gaman ef einhver myndi segja mér það), en það þýðir að ég neita að gefa þessu æðra máttarvaldi eitthvað ákveðið nafn, og ég bið ekki til þess. Þetta heitir ekki Guð eða Jehóva eða Búdda eða Allah eða neitt slíkt. Þetta er bara.. æðra máttarvald.

Í grunnskóla gekk ég í gegnum svokallaða kristinfræði eins og allir aðrir. Þetta fag var náttúrulega lauslega byggt á biblíunni, og þurftum við að geta svarað hinu og þessu uppúr því riti. Þetta var hins vegar enginn sérstakur prédikunarboðskapur svo ég muni, heldur að mestu leiti verið að kenna börnunum muninn á réttu og röngu eins og biblían kennir það. Prédikunin kom í raun ekki fyrr en um fermingu, þegar við sátum undir öskrum Séra Kölska (blessuð sé minning þín Séra Þórhallur, og vona ég að þú hafir aldrei vitað hvað þú varst kallaður í skólanum) í fermingarfræðslunni og reyndum að verða SannKristin á mettíma.

Eigi skal ég halda því fram að ég hafi komið úr grunnskóla uppfullur af kristinfræði (enda hafði ég svosem ekki mikinn áhuga á því fagi) en þó veit ég að ég þroskaðist sem fullorðinn maður með ofboðslega sterka réttlætiskennd. Sá maður sem ég er í dag, er sambland af þeim gildum sem skólinn og foreldrarnir kenndu mér, en það er langt því frá að ég sé neitt sérstaklega 'Kristinn'.

Þegar maður skoðar boðorðin tíu út frá sjónarmiði einhvers sem er ekki Kristinn, kemur hins vegar í ljós að ef frá er tekið það sem beinlínis snýr að Guði, er þetta að megninu boðskapur sem allavega ég tel bara vera hið sjálfsagðasta mál í eðlilegu samfélagi. Lítum aðeins á Boðorðin Tíu:

1. ) Ég er Drottinn Guð þinn. Þú skalt ekki aðra guði hafa
2. ) Þú skalt ekki leggja nafn Drottins Guðs þíns við hégóma
 - Fyrstu tvö eru beinlínis fyrir Guð.. pælum ekki í þeim hér.
3. ) Halda skaltu hvíldardaginn heilagan
 - Hverjum manni er nauðsynlegt að hvíla sig frá vinnu og amstri, og deila tímanum með fjölskyldu sinni og/eða vinum. Við eigum ekki að vinna 7 daga vikunnar, það er bara ekki holt!
4. ) Heiðra skaltu föður þinn og móður
 - Þetta mætti kannski útleggjast sem "Heiðra skaltu þá sem ólu þig upp" í nútíma samfélagi, þar sem Faðir og Móðir líffræðilega séð eru kannski ekki endilega til staðar. Jafnvel þó að sambandið geti oft verið stirt, þá skal maður þó alltaf bera virðingu fyrir sér eldra fólki og þeim sem ala mann upp og veita manni húsaskjól; án þess þó að fylgja þeim í blindni.
5. ) Þú skalt ekki mann deyða
 - Ekkert sjálfsagðara. Við viljum ekki vera drepin sjálf og eigum ekki að vera að drepa aðra. Þetta eru einföld landslög.
6. ) Þú skalt ekki drýja hór
 - Þó að nútíma notkunin á orðinu hór sé ekki sú sama og þarna er talað um, er boðskapurinn einfaldur. Þú átt ekki að halda framhjá maka þínum og svíkja hann. Fólk á að standa saman og ef það getur það ekki þá á það að hætta saman áður en það leitar á aðrar slóðir. Allt þetta bull um að hanga saman fyrir börnin eða fyrir hvort annað eða slíkt, þegar fólki líður virkilega illa saman og fer að leita annað, er bara vitleysa. Börnin vita alveg hvað er í gangi, og það er mun verra fyrir þau að búa tveim manneskjum sem líður illa, heldur en einni manneskju sem líður vel.
7. ) Þú skalt ekki stela
 - Aftur, ekkert sjálfsagðara. Við viljum ekki að hlutum okkar sé stolið, og við eigum því ekki að stela annarra manna hlutum. Þetta eru einföld landslög.
8. ) Þú skalt ekki bera ljúgvitni gegn náunga þínum
 - Það er ljótt að ljúga, og viðbjóður að ljúga upp á aðra.
9. ) Þú skalt ekki girnast hús náunga þíns
10.) Þú skalt ekki girnast konu náunga þíns, þjón, þernu, fénað né nokkuð það sem náungi þinn á.
 - Þessar tvær eru reyndar alveg stórmerkilegar þegar litið er á þær í dag. Eiginkona er það sama og sauðfé; eign, en húsið er sérstaklega tekið fram. Upplýst og siðmenntað samfélag skyldi ALDREI samþykkja þessar reglur eins og þær eru skrifaðar. Ég ætla því að skrifa þær eins og þær EIGA að koma fram:
9. ) Þú skalt ekki girnast konu náunga þíns
 - Tengist aftur hórinu. Kona vinar þíns er, eins og sagt er, Off Limits. Þú stingur ekki undan vinum eða fjölskyldu.
10.) Þú skalt ekki girnast hús náunga þíns, bíl, sjónvarp, fé, né nokkuð það sem náungi þinn á.
 - Hérna komum við í raun að þriðju og síðustu reglunni sem mætti sleppa úr boðorðum hins almenna manns. Það er nákvæmlega ekkert að því að langa í nýja hluti, og (van)heilbrigð keppni milli vina getur stundum verið af hinu góða. Menn reyna allavega að komast áfram í lífinu til að verða betri en hinn, og úr því GETA skapast mjög góðir hlutir. Mig langar í milljónirnar sem Bankastjórar Íslands hafa í laun á mánuði. Er ég eitthvað verri maður fyrir það ? Ég fer í skóla og læri eitthvað og betrumbæti mig til þess að fá hærri laun, og það er bara ekkert slæmt um það að segja.

En loks komum við að meginmáli þessa pósts; aðskilnaði skólans og kirkjunnar. Ég trúi því af öllu mínu hjarta að kristinfræði þurfi að leggja af í skólum, og í staðin skuli inn sett tvö fög; Siðfræði og Trúfræði.

Siðfræði væri byrjað að kenna við frekar ungan aldur, og myndi taka við kennslu kristinfræðinnar hvað varðar almenna hegðun og siðferðiskennd, ásamt því að taka við hlutverki kynfræðslu. Þar yrði börnum kennt að haga sér almennilega, bera virðingu fyrir eldra fólki, kunna einföld landslög, læra að þekkja muninn á réttu og röngu, læra að vera þakklát og svo framvegis. Kennarar væru helst fólk svona í eldri kantinum (eldri en 40) með vel af lífreynslu á bak við sig. Krakkarnir myndu heimsækja elliheimili og hitta spræk gamalmenni sem myndu segja þeim sögur frá gamla tímanum, ásamt því sem börnum yrði sýnt hvernig fólk lifði magurt í byrjun 20 aldar og þeim yrði kennt að vera þakklát fyrir þær ótæmandi auðlindir og alla þá hluti sem hægt er að kaupa í dag. Löggur og Slökkvikallar (hver elskar ekki hetjur í búningum? :)) til dæmis myndu mæta í skólann og kenna krökkunum að fara aldrei neitt með ókunnugu fólki, og kenna meðferð elds og eggvopna og annað slíkt. Læknanemar, veikir reykingamenn, óvirkir alkahólistar og fíklar myndu koma í skólann og segja börnunum hvað líf án eiturefna er svo miklu betra líf. Kenndar yrðu hinar ýmsustu kynferðiskenndir (lauslega fyrst og svo nánar í kynfræðslupartinum) og þá sérstaklega kenndur munurinn á Gagnkynhneigð, Samkynhneigð og Tvíkynhneigð, og börnum kennt að dæma ekki aðra fyrir sínar langanir og styðja við þá sem 'koma út'. Siðfræði myndi vera fag sem elur börn upp, upp að vissu marki, sem er eitthvað sem er virkileg þörf á í nútíma samfélagi þegar foreldrar hafa engan tíma til að vera heima og ala börnin sín upp sjálf. Skólinn skyldi þó aldrei bera ábyrgð á uppeldi barnanna þar sem slíkt skal alltaf vera á ábyrgð foreldra, en skólinn myndi þó allavega veita börnum sem ekkert eru alin upp heima hjá sér, ákveðið aðhald og grunnkennslu sem gæti bjargað því sem bjargað væri.

Trúfræði væri byrjað að kenna aðeins seinna en þó ekki alltof seint, og myndi kenna trúmál. Þar væri helstu trúarflokkum gerð góð skil, og eitthvað vísað í þá minni. Kristni, Kathólismi, Búddismi og Kóraninn væru tekin fyrir, og kenndur væri grundvallarmismunur á þessum trúm, ásamt útskýringum á hinum óteljandi afbrigðum þessara trúarhópa, ofstækis- eða annars. Prestar eða aðrir rólegir trúboðar myndu koma og kynna sinn boðskap, og skipulagðar yrðu ferðir í amk. eina messu hverrar trúar á hverri önn, en þó eftir því hvernig aðstæður væru. Til dæmis eru eingöngu kristnar kirkjur í mörgum bæjarfélögum landsins, en þá yrði bara að vera mikilvægt að þeir prestar og trúboðar sem aðstoðuðu við kennsluna væru virkari og kæmu þá bara oftar. Ég hef ekki enn hitt trúboða sem er latur, þannig að ég er viss um að slíkt væri lítið mál. Hér í Reykjavík væri þetta mun einfaldara, og væri hægt að fara með börnin í enn fleiri tegundir af kirkjum. Aðal málið væri að Kristni væri ekki gert hærra undir höfði en hinum, og börnum yrði kennt að þau hafa val. Val til þess að trúa á EKKERT, eða eitthvað sem þau vilja.

(( - Í framhjáhlaupi vil ég meina að börn eigi alls ekki að skíra til trúar við fæðingu, heldur eingöngu skíra að nafni. Börn myndu síðan skírð inn í þá trú sem þau vilja, ef þau vilja, í kringum fermingaraldurinn eða fyrr ef ÞAU myndu kjósa sér að gera slíkt. Kæmi skírnin þá í staðin fyrir ferminguna. Það þarf nauðsynlega að slökkva á þessari peningagræðgi og smán sem við köllum fermingar, þar sem aðeins um 10% af krökkunum gera það að EINHVERJU leiti vegna trúarinnar, og hin 90% gera það eingöngu fyrir gjafirnar - ))

Var verið að taka upp bíómynd?

Ég man ekki nákvæmlega töluna en einhversstaðar las ég að líkurnar á að kvikni í bíl við árekstur eru alveg fáránlega litlar. 1:100.000 eða eitthvað álíka gáfulegt. Slíkt gerist einmitt oftast bara í kvikmyndum. Til þess að það gerist þarf bensín að leka yfir allt, og þarf rafkerfið að neista (ítrekað) á stað þar sem miklar bensíngufur eru. Það er því engin smá óheppni að það skyldi hafa kviknað í þarna, en eins og Steini orðaði það, þá var lán í óláni að þetta gerðist allavega á fáförnum vegi, og enginn slasaðist alvarlega.

Minni á spjallsíðu Íslendinga með skoðanir, http://www.nyjaisland.is 

Tveir bílar brunnu eftir árekstur

Hið Nýja Ísland.

Það fer varla framhjá nokkru einasta mannsbarni á Íslandi (eða nokkru öðru landi) að í dag stöndum við á bakka straumþungrar ár breytinga, og reynum að komast yfir.

Flestir líta á strauminn og eru dauðhræddir við að reyna og sumir hafa nú þegar gefist upp og liggja eins og dauðyfli á gamla bakkanum, en nokkrir horfa yfir strauminn bjartsýnisaugum og trúa að þeir komist yfir þrátt fyrir að hafa ekki enn fundið réttu leiðina.

Á hinum bakkanum sitja hins vegar nokkrir vel feitir og glaðir menn, skála í vín og borða humar, og glotta yfir okkur aulunum. Þeir höfðu nefnilega ferjumann sem bar þá yfir ánna og settist svo að hinumegin til að glotta.

Það eru nefnilega nokkrir Íslendingar sem hafa ekki nokkrar einustu áhyggjur af stöðu Íslands, því þeir eru búnir að koma sínu fé og sinni framtíð út frá Íslandinu litla, á kostnað okkar hinna.

Hinir Íslensku stjórnmálamenn hafa setið í lengri tíma með puttann í rassinum og ekkert gert til að stoppa þessa vitleysu sem er búin að vinda upp á sig. Í dag er svo komið að Ísland er orðið eitt hataðasta land í heimi, ekki langt frá Ameríkuhreppi hinum mikla, vegna þess að við höfum ekki efni á því að borga alla peningana til baka sem bankastjórar og útrásarfrík stálu frá íbúum annarra landa eins og Bretlands og Hollands . Svo tala allir um að við fáum bara lán einhversstaðar frá og reddum þessu, alveg sama hvað það kemur til með að kosta okkur, og síðar skuli talað um orsakir og ásaka. Því miður er það bara svo að eftir mjög stuttan tíma verður búið að "rannsaka" allt þetta mál og þar mun koma í ljós að ekki einn einasti maður stóð sig illa, ekkert samráð var neins staðar haft, engar rangar ákvarðanir voru teknar og verst af öllu.... þetta var ekkert svo slæmt! Eftir sitja Íslendingar sárir og horfa upp á það að allir þeir sem okkur brugðust halda áfram að stjórna okkar lífum!

Við, almennir Íslendingar, verðum að taka saman höndum og sameinast í því að STÖÐVA þessa brjálæðinga áður en þeir gera illt verra. Í stað þess að sitja á kaffistofum landsins og röfla um allt og ekkert, þá verðum við GERA eitthvað. Við verðum að koma þessu fólki frá völdum, og slíkt gerist aðeins með samstöðu. Ekki svona málamynda mótmælabröndurum eins og við höfum verið að stunda síðustu árin með engum árangri! Man til dæmis einhver eftir vörubílstjórum og mótmælum þeirra? Nei, hélt ekki. Það er langt því frá að ég eigi öll svörin við þessu vandamáli, nema þá helst að fara Amerísku leiðina og hreinlega skjóta þetta fólk, en alveg er ég viss um það að það er fullt af Íslendingum með frábærar hugmyndir sem væri hægt að virkja.

Nú er svo komið að Vilhjálmur G. Ásgeirsson hefur sett saman síðu með það eina markmið að sameina hugsandi fólk í baráttunni og vona ég innilega að sú síða verði vinsæl mjög, en ég vil ljúka þessum pósti með því að bjóða ykkur öllum á síðuna hans Villa, og endilega skrá ykkur og taka þátt í umræðunum þar.

http://www.nyjaisland.is

En hvað með Norðmenn?

Norskur vinur minn spyr mig í algjöru sakleysi í gær: "Af hverju eruð þið að taka lán frá Rússum þar sem BÓKAÐ er að eitthvað hangir á spýtunni, þegar mínir ráðamenn (þeir Norsku) eru búnir að bjóðast til að lána Íslandi þessar sömu 4 Milljarða NOK eða hvað það nú var, sem Rússarnir eru að bjóða? Það hlýtur alltaf að hanga minna á spítunni þegar grannaþjóð býður sína hjálp, heldur en stórveldið Rússland og herra Pútín sem engin treystir."

Ég verð því að spyrja eins og Per gerði svo skilmerkilega, af hverju í ósköpunum erum við að taka þetta lán frá Rússum ef við getum fengið það frá Norðmönnum? Er ekki allt í lagi?

Gísli Marteinn: Vill frekari skýringar á Rússaláni

Airwaves klúðrar enn og aftur.

Þetta er ekki í fyrsta skipti, og sjálfsagt ekki í síðasta skipti sem forsvarsmenn Iceland Airwaves klúðra einföldum málum. Hvað er betri landkynning en Íslensk hljómsveit sem 'meikar það' í útlandinu? Guð veit að við þörfnumst betra eintaks en við eigum í þessu Bjork dæmi okkar.

Er Flugfélag Íslands ekki styrktaraðili að hátíðinni? Eru ekki flugvélar hvorteðer hálftómar? Hversu flókið er að gefa hljómsveitinni 50% afslátt af fluginu, eða jafnvel bara frítt?

Hætta við að koma á Airwaves